訪港視製作總監李志堅：不做新聞搞購物，Why not？

香港電視近日跟快餐店合作，於《警界線》內植入「點Jack」廣告，牽起熱潮。
不少觀眾特地登入網站，將劇集連廣告，一併重溫。
廣告人畢明觀察到相同現象，打趣說「看香港電視的人都變了態」。
也不難理解，香港人對港視期待已久，當然「汁到撈埋」，連廣告也不放過。
但較少人留意，港視開台主打的，除了「電視」，還有「購物」。
大半年前，王維基事先張揚，要開設一條24小時購物頻道，而劇集本來只是配菜。
頻道預計下月啟播，幕後團隊現時則每天製作直播節目Shopping Hero，替客戶宣傳商品。
結果廣告雜誌式的節目，引來少有的劣評。
有觀眾大叫沉悶，甚至說，「好似有點娘味」。

負責主管購物頻道的港視製作總監李志堅倒看得開。
「都係要一路試落去。壓力係有，但仍然有空間試。」
反覆強調「試」，大概因為他本人也在「試」。
幾個月前，李志堅的身分是香港電視新聞總監，主管新聞部。
豈料牌照告吹，新聞部門隨即解散，分道揚鑣。
做了二十年新聞的他，前路茫茫，本打算創業。
結果王維基一通電話，令他跟另一同事繼續留守，改做購物頻道。

「咪試吓囉！」

訪問約定在香港電視的辦公室進行。開始前，我們先走進錄影廠裏逛了一圈。由一般辦公室改裝而成的錄影廠，樓底不高，甚至頗有山寨廠的况味，但現時卻每天進行兩次直播，拍攝Shopping Hero節目。我們參觀的時候，工作人員正落力地試燈光，試位置，準備一小時後的節目綵排。踏出錄影廠，便是購物頻道創作團隊工作的辦公室。驟眼看來，都是年輕的臉孔。

要畀年輕同事試

過去幾個月，李志堅跟這班年輕人一同籌備購物頻道。頻道正式啟播前，先有每天共兩小時的購物節目，既試水溫，又讓幕後人員邊做邊試。「我們有一半同事都係九十後，唔畀佢試，咁好『抆』喎。」李志堅一臉認真，舉例解釋。「例如有產品是口服的，就要注意醫藥條例，唔可以隨便話預防癌症啦，唔可以話降低膽固醇，只能夠話『適合關注膽固醇人士服用』。」他說，許多新人沒有這種意識。「他們不一定會理，但寫完我們會犯法。所以要有trial run，這個階段壓力會有，但不算很擔心。」

總監唔急，觀眾急。購物節目推出後，坊間反應平平，有專欄作家甚至批評節目「有陣ATV味」。李志堅不諱言，節目既要顧及觀眾，又要向商戶交代，不是易事。「要做到個個party都話正，其實好難。當然有好多關心我們的朋友會話，『喂！做靚啲啦！有趣味性啲啦！多啲人睇啦！』出面朋友對我們期望好高。」面對批評，李志堅強調團隊會繼續嘗試。「畢竟這件事在香港無乜好好的reference，亞視有做過，但係咪好成功呢？又未見到。同埋從未試過咁大規模。」港視已聯絡三百三十間商戶合作，他日瀏覽購物頻道，貨品選擇將會超過十萬種。規模之大，香港少見。

話你知個餡其實係乜？

電視購物，在台灣、日本、韓國都頗為流行，偏偏在香港，卻是新鮮玩意。王維基年中公布大計後，許多人並不看好，認為香港的大商場遍地開張，顧客要購物本已很方便。李志堅坦言自己曾經同樣懷疑，只是後來到韓國做研究，看見人家的購物頻道，賣的貨品包羅萬有，表達方式百花齊放，才有所改觀。但放在香港，究竟可不可行？他以太太的日常生活作例，「佢係一個OL，平日八點收工，基本上無得行街，如果平日工作不開心，都無得買嘢發泄。如果個電視好似櫥窗咁，會唔會吸引到消費者呢？」但李志堅強調，他們不是要做一般的廣告雜誌，「除了拍件product，更要想想怎樣將它應用於日常生活的畫面，例如拍一些台灣式的微電影。」

呢啲叫責任消費

香港人工時長兼不快樂，已是常態。但早已成形的消費習慣，有可能改變嗎？李志堅認為，習慣一時三刻也許改不了，但香港人的消費態度，卻應扭轉﹕「譬如買個袋，你有無諗過佢點樣嚟？成個概念係點？用料係咪OK？如果消費者對件產品的故事認識多啲，我有理由相信佢買的時候會諗過度過，買返去理論上亦會用得耐啲。」他說，這叫責任消費。

話題轉到近日大熱的「點Jack」廣告，以及「變態」的港視觀眾。香港人向來對電視廣告沒太大感覺，甚至視之為「廁所位」、「生果位」。偏偏港視開台近一個月來，不少人破例高呼「廣告愈多愈好」。李志堅主理購物節目，廣告製作與他無關，但他作為觀眾，同樣興奮。「我記得開台當日，朝早起身，一睇到廣告就覺得『點解啲廣告咁好睇嘅？』」筆者笑他誇張，畢竟港視的廣告客戶，跟TVB其實差不多。「係係係！我平時都好憎睇廣告，但當日唔知點解……可能因為真是等咗好耐，等開台都等咗四年。睇到廣告，知道嗰個係收入來源，即係有人支持喎！」李志堅頓了一頓。「係一種……抑壓咗好耐的釋放。」

「其實都係嗰啲廣告，都係咩咩白咖啡。但好多人都話未睇過！」李志堅分析，觀眾反應異常，說到底不過出於對香港電視的偏愛。「你當係鋤強扶弱又好，當係抑過咗好耐又好……我們目標係做一個香港人的電視台，現在終於面世，（觀眾）當係捧場，當然連汁都撈埋。他們這幾年有跟住我哋的事態發展，支持我哋嗰種精神、香港精神的，應該唔會介意連廣告都睇埋。」

十年準備 被政府煞停

觀眾為港視開台雀躍，李志堅身為員工，前後在這裏工作近十年，感受理應更深。今年三月，港視推流動電視受阻，他跟新聞部同事一同被裁。現在回想，依然唏噓。「好正常啫，你諗吓，今年年頭諗住做嘅嘢，突然間無得做，你點會開心呢？當時老婆都話我，不事生產啦，無正職，行行企企。」他當時接受媒體訪問，直言自己作為新聞總監，要派解僱信給並肩作戰多年的同事，感覺像「割掉自己一塊肉」。

想過用「癲噹」報天氣

痛苦，只因本來滿腹大計。李志堅主理的電視新聞部，當年不乏新嘗試。他們試過跟漫畫家合作，以「癲噹」報天氣，也試過拋棄「數白欖」形式，另闢蹊徑，改以微電影、主題方式做年終的大事回顧。到今年年初，他除了巡迴各間大學，招攬新血，更密謀構思一支二十多人的偵查報道團隊。「整隊人不用做daily嘢，專注做古仔。當然依然電視台都有類似的報道，但無所謂，大家有資源咪去做多些有深度的報道囉！」他認為這是大勢所趨，「新一代唔會只係滿足於純粹報道。啲事我都知道啦，點解要睇你個台？他們只會願意花時間，接收一些有價值的資訊。」可惜牌照失落，計劃告吹，他改革電視新聞的夢想，始終落空。

如做新聞 要把關睇稿求證

李志堅在新聞行業打滾了超過二十年。九二年，他進入無綫新聞部實習，一年後畢業轉為正職，「因為當年有線開台，（無綫）走了不少人，好缺男記者，做啲粗重嘢。十個intern入面，只有我一個男仔，唔算最叻，但就請咗我。TVB係好好畀記者成長的地方，一路做，一路學到許多製作新聞的技巧、原則。」二十年過去，無綫新聞部金漆招牌早已墜下，李志堅也退下新聞崗位，毅然開發購物頻道。「做呢個位要把關、睇稿，做fact check，都好似以前做新聞，技巧有相通之處，都唔係咁難適應。」他微笑。

但畢竟在新聞行業埋首多年，這決定豈不艱難？李志堅依舊樂觀，「其實都無咩掙扎唔掙扎，我的事業第一個十年在TVB成長，第二個十年在這裏學做新聞，咁第三個十年，可以做什麼？我本來以為自己會做電視新聞，但無喎！咁做shopping channel會唔會係另一個挑戰呢？」年初新聞部解散後，李志堅本來想過創業，辦新聞媒體，在尋找投資者的過程中，卻處處碰壁。到五月左右，他接到王維基電話，邀請回巢做購物頻道。「佢打嚟，話呢個project其實都係創業啫，叫我用半日時間考慮。」他爽快答允。「可能因為我對香港電視這個平台，還有憧憬。咪試吓囉！」

少談執著 多講can-do

眼前的李志堅為人樂觀，甚至有點世故。訪問中，他少談堅持、執著，多講嘗試、變通、can-do。但言談之間，這位前新聞總監偶爾又會流露自己對新聞專業的眷戀。「有人話我（轉做shopping channel）是逃兵，我覺得唔係囉。」看得出，他仍然介懷。「鍾意新聞，係咪一定要做記者呢？最好當然自己落手做，但如果個際遇、環境有變化，咁作為香港人，是否應該要適應個變化呢？我覺得可以嘗試做唔同的project。」他如此解釋。

不脫離新聞 拍紀錄片

李志堅也在大專院校教書，任教電視新聞。年初開始離開新聞崗位，身為老師，他於心有愧。「唔能夠脫離太耐，教新聞要實戰同理論並重，唔可以停。」於是他開始在公餘時間拍紀錄片，主題是他最熟悉的「電視記者」。「好多人成日話佢哋片面報道，究竟係咪真係咁呢？心裏有個迷思。」紀錄片由年中開拍，直至佔領運動開始，題材突然大增。「原本只諗住拍二十分鐘，但依家估計拍到七八十分鐘，之後會考慮搵戲院放映。」提起這個side project，他一臉自豪。

探討兩代新聞人的鴻溝

紀錄片內容圍繞電視新聞記者，核心主題則是近期最流行的「世代矛盾」。李志堅說，雨傘運動固然與世代矛盾有關，但這套論述同樣能應用在電視記者身上。「拍的時候，咁啱發生無綫電視記者聯署事件，當中好多都係二十、三十世代，跟管理層那班四十、五十世代的人，明顯有唔同的價值取向，有衝突。」他舉例說明。「例如有些記者好支持個運動，咁點好呢？我哋嗰個年代係咁教嘛，如果你有參與個行動，有表態，咁就唔應該做採訪，要避嫌。但呢一代唔係咁諗，佢哋覺得做報道會中立、專業，其他時候可以為學生、為警察打氣。」兩代新聞人，間隔着鴻溝。

後記

揸機入佔領區 做訪問

但始終相同的，是對採訪的熱誠。為了拍攝紀錄片，李志堅親身上陣，揸機出入佔領區，跟行家們做訪問，他自言無官一身輕。「無咗新聞總監的身分，可以周圍搵人傾嘢影嘢，唔使尷尬。」他甚至為新嘗試而慶幸。「如果唔係無得做新聞台，就唔會做這件事啦。到時應該係指揮緊啲人去做，唔會自己落手落腳。所以際遇嘅嘢，有時好難講。」

客串《選戰》

撕去新聞總監的名牌，還換來亮相電視劇的機會。李志堅在《選戰》第二集客串一角，飾演富二代，身邊是資深演員駱應鈞。「既然無咗新聞總監的包袱，我平時又會睇電視劇，咁咪試囉。當然後果都要諗，不過就算之後做返新聞，咁新聞總監係咪唔可以拍劇集呢？又無講過呀。」說到尾，一切只因他熱中嘗試。「你可以好多嘢諗，然後諗完唔做。咁點解唔試吓呢？」由開發電視購物，到客串《選戰》，他從一而終。

刊於明報星期日生活20141214

Share