Monday, October 27, 2014

傘開以後:小人物,睜開眼

Mr. & Little Ms. HK People插圖系列創作人Maxwell


黑夜悄然離去,太陽探頭冒出。清晨的金鐘,換上迥然不同的一道風景。天色由暗轉亮,陽光躡手躡腳地鑽進帳篷,推醒一個個好夢正酣的年輕人。是繼續沉睡,還是睜開雙眼?帳篷內的他們,總有幾分猶豫。

但就政治而言,他們卻是態度明確:不再猶豫,拒絕沉睡,選擇覺醒。

佔領運動已持續近一整月。不少人說,這次投身運動的,許多都是陌生臉孔。這些臉孔以往討厭政治,不曾參與七一遊行、六四晚會。但這一次,卻選擇遠離鍵盤,立足街頭,甚至自動獻身,在傘下各就各位,跟其他小人物一同揮灑汗水,編織大時代。無論他們上街的理由為何——或受大學生呼喚,或被催淚彈感召——雨傘運動都注定造就一代人的政治覺醒。

也有人更在意孩子們的覺醒。「小朋友應該要知道有班哥哥姐姐,為了香港的未來而每日喺街上面瞓。」Maxwell於是繪畫雨傘運動主角,創作出Mr. & Little Ms. HK People的插圖系列。當中有林鄭、長毛等大人物,也有Mr. Lion Shan、Mr. Hungry等小人物。「其實嚟得抗爭嘅,全部都唔係小人物……」他一臉認真。

「人人都係大人物。」



 催淚彈觸怒平民

Maxwell也是小香港人。鼻樑架着一副黑框眼鏡的他畢業數年,現職廣告公司,從事設計。跟許多香港人一樣,他對醞釀年半的佔中行動,本有保留。「最初有啲覺得會阻到人,同埋真係犯法嘛,所以都唔想太into這件事。但因為催淚彈,真係好嬲,好嬲。」Maxwell認為,這也是不少港人上街的原因。「而家條街咁多人,未必因為政府真係做得咁差……其實大家一早知道佢做得差。最終喚醒到香港人的,係一份怒氣。」

這份怒氣,令本來打算袖手旁觀的Maxwell醒覺,自發走上街頭,支援運動。「都係買必需品呀,幫手派嘢呀,在佔領區行來行去。」到一星期前,他開始嘗試另一方式的參與。「那天搭車,突然在想,其實家長可以點樣同小朋友講社會發生緊咩事呢?有咩素材可以用呢?無理由用TVB新聞架嘛,咁暴力。」燈泡一亮,Maxwell即晚創作多個維肖維妙的卡通政治人物。結果作品在網上瘋傳,幾天過去,專頁已有逾五萬人讚好。

 畫出閃亮小人物

孩子的覺醒何以重要?「其實好多人出來抗爭,都唔係為了自己,而係為了香港的未來。」Maxwell微笑解釋,「小朋友條命長過我哋,佢哋先會係呢場運動的最大得益者。」的確,不管佔領最終能否逼令政府回心轉意,它至少已經改變了香港的未來。「講真,今次未必有咩理想結果,但過程入面已經改變咗好多東西,例如好多人唔再單單留喺屋企睇新聞,好多人在政治方面已經覺醒了。」Maxwell語重心長。

當然,對於Maxwell的插畫,許多人不過為求一笑。因此這段日子,最多人提議他畫的,竟然是李偲嫣。「其實我想畫支持運動的人,多過政府或者反對的人。因為我想大家笑完之後,都可以支持場運動多啲。呢件事牽涉好多人,我表達到的只佔好少部分。佢哋比較多人關注,而我就趁機畫出來。」但在鎂光燈以外,還有愈來愈多閃亮的小人物。「有好多我睇唔到嘅,希望之後可以在現場親眼去睇,然後再畫出嚟。」只因雨傘下的主角,從來不限於梁麗幗、周永康、黃之鋒,還包括自修室旁的木匠、救傷站內的義工、看守防線的哨兵,以及在帳篷下睜眼留守的萬千港人。

 喚醒隱蔽中學生

這一夜,筆者走在公路上,跟佔領區內不少小人物傾談。他們肯定不是Maxwell筆下那些備受注目的大人物,嘴裏也未必說得出許多發人深省的大道理,但今天他們都選擇穿上黑衣,成為公路上萬千小人物的其中一個,全因傘開之後,每個香港人的內心,都有不同程度的覺醒。

有以往厭惡政治的學生開始醒覺,像穿著整齊校服的中四學生Cheenee。她與同學Yoyo放學後特地由東區前來,為的是爭取二○一七年可以選到合自己心意的特首,「因為三年後我十八歲,可以做選民。」同行的Yoyo因為父親影響,從小關心社會,是遊行常客,但Cheenee卻是另一極端:「以前唔係好關心,只係間唔中留意下。會覺得立法會好亂,成日好似鬧交,好醜陋,唔想接觸咁多。」她坦言,從前的自己少管政治,只理時事,「即係有人受傷呀,撞車意外嗰啲。」

着眼「時事」是小女生,卻被催淚彈激發,首次決定上街:「睇到新聞,真係好嬲。點解警察要咁樣對付學生?第二日就來了,想出一分力,希望這分微小的力量可以幫到學生。」Cheenee形容,身邊不少朋友也因這場運動而覺醒。「有一個之前同我們一齊嚟的男同學,平時唔會離開屋企,淨係識打機,就連食嘢都要叫外賣。今次佢竟然都出來,仲幫手舉牌呀、寫紙呀。真係估唔到。」落在雨傘上的催淚煙霧,化成最響亮的良知感召,不知喚醒了多少蒙住雙眼的年輕人。

 由討厭變成理解

在紅棉道橋底駐紮的Danny是另一例子。他熱中打機,自認跟王菀之一樣討厭政治:「好老實咁講,平時都係打機,唔理呢啲野。到罷課開始,感覺到開始大件事,但我都係想睇多陣LOL比賽囉!」每個逃避政治的人,都有不同的原因。Danny表面怕用腦,坦言「關心政治就像要讀多一科,好辛苦」,但細問下去,才曉得他拒絕政治,全因對自己要求太高:「東北發展我無理到,因為正反理據太多,唔知點樣深入研究;白皮書我都無睇晒,淨係睇節錄一段,好多嘢都唔知。咁唔係幾好囉!」

眼前這個自稱不諳政治的大專生,卻因雨傘運動而改變。「在街上會遇到好多人來勸告,建制派、談判專家、反佔中的人,聽到他們的說話,例如成日有人來問『有真普選咁又點?』你會諗深一層囉!」Danny說,透過同路人之間的討論,又或是公民講台上的發言,無意間就學到許多政治知識。問他現在是否不再討厭政治?「好老實咁講,討厭就梗架喇。就算係黃之鋒、梁振英,都唔鍾意(政治)架,但唔鍾意還唔鍾意,佢係影響緊全香港市民嘛!你可以覺得佢煩,但都要關心,都要理解,都要知道。」佔領的經歷,令這個打機少年,說話變得有節有理。


 人生的政治啟蒙

由討厭到關注,是覺醒;由盲目關注到認真思考,亦未嘗不是覺醒。在海富天橋下畫漫畫的Timothy以往也曾為反國教事件而站出來,但又始終認定這次運動,才是他人生最重要的政治啟蒙:「之前都會了解件事,但就無今次咁深。可能因為這次的議題牽涉到成個香港,那種嚴重性會推動我去認真去諗好多嘢:我眼中的自由、民主究竟是怎樣的呢?香港的將來要係點,先稱得上好的發展?」才十八歲的他,在一腔熱誠以外,也有慎密細微的思考。
 媒體素養的提升

有年輕人則在其他層面上開始思考,例如媒體。中六學生Lorraine形容,自己向來絕少讀報:「之前都係老師畀就睇,英文科要做剪報就望下,從來唔會好深入咁研究任何issue。」最近一個,她卻跟報紙成為好友,「一有機會就會拎晒成個星期的報紙嚟睇,了解多啲。」旁邊的同班同學Chopper插話,「開始咩報紙都會睇,因為不同報章有不同立場,要睇晒,先可以知道成件事係點。」一場運動,令新一代的媒體素養,直線上升。

那夜,筆者跟許多小人物傾談,蒐集雨傘下的覺醒故事。聽過他們的真摯分享,才曉得原來從沉睡中蘇醒的人,其實只屬少數,更普遍的現象,是以往只有關心,沒有行動,甚或以鍵盤取代雙腳的人,這次都紛紛告別安舒,走上街頭。

 沒資格在家睡覺

例如在天橋上盤膝而坐的Leo與阿壕。兩人讀大學二年級,是社運初哥。「好老實講,之前連遊行都無出過來。Even七一,會關心,會留意,但唔會行動。好似無咩initiative咁,個感覺係:都幾十萬人啦,多一個唔多,少一個唔少。」樣子斯文的阿壕說。九二八當日的電視直播,卻讓他改變想法。「成班friend在出面,食胡椒,食催淚彈,我有咩資格在屋企瞓覺?」自此,他和同伴隔天在馬路上過夜。「從來無expect過自己去得咁盡。」說話夾雜有幾分沉重。

他倆這次遠離鍵盤,立足街頭,卻有另一番體會。「我發現……原來自己都幾愛香港。」說話內斂的Leo語出驚人,教旁邊的阿壕同伴偷笑。「其實我之前成日笑香港人怕死,唔夠膽,次次遊行完就返屋企。但那天見到催淚彈啲煙散咗,班人竟然會行返轉頭,圍住警察,真係嚇親。我以後唔會再笑香港人。」阿壕收起笑容,一臉正經。「本來我驚好多嘢,畀人拉、留案底……但廿八號晚好似比人叫醒咗——人哋咁都唔淆,我仲有咩要驚呢?」黑夜裏,他的眼神依然堅定而閃亮。

告別他倆,已是夜深。沿天橋返回夏愨道上,卻發現不少人仍未進睡。他們睜開眼,抬起頭,彷彿在等待下一次天明。慶幸長夜裏有願意覺醒的一群,大人物。


刊於明報星期日生活20141026

No comments:

Post a Comment

 

webpage tracking stats
PlayStation 2 Game